OAV VAKILIGA TAHDID QONUNGA TAHDID! XODIMIMIZNI HIMOYA QILAMIZ!

Farg'ona viloyati huquqni muhofaza qiluvchi organlari rahbariyati diqqatiga! Bugungi kunda jamiyatda ochiqlikni ta'minlash va ommaviy axborot vositalarining erkin faoliyat yuritishi davlat siyosatining ustuvor yo'nalishi etib belgilangan. Biroq, amaldagi qonunlarni mensimaydigan, o'zini ko'cha qonunlari bilan boshqariladigan o'tmish davrlarida deb hisoblaydigan shaxslar tomonidan OAV xodimlariga nisbatan bosim o'tkazish holatlari kuzatilmoqda.

Vaziyat tafsilotiga ko'ra, Fergana Media ommaviy axborot vositasi vakili Yodgorbek Qo'shaqboevga nisbatan uning xizmat vazifasini bajarishi bilan bog'liq ravishda noma'lum shaxslar tomonidan ochiqchasiga tahdidlar boshlangan. O'zini ko'cha botirlari qilib ko'rsatayotgan bu shaxslar OAV vakilining shaxsiy hayotiga daxl qilib, uning yashash manzilini aniqlash va jismoniy tazyiq o'tkazish xarakati kompaniyasi boshlab yuborishgan.

Biz adolat va haqiqat yo'lida xizmat qilayotgan xodimimizning huquqlarini barcha qonuniy vositalar bilan himoya qilamiz. Huquq-tartibot idoralaridan ushbu masalaga shaxsan viloyat rahbariyati darajasida e'tibor qaratilishini kutib qolamiz. Fergana Media tahririyati.