КЎЧА ҚОНУНЛАРИ ҚАЙТДИМИ?

Юкланмоқда...

Сўз эркинлиги ва журналистлар хавфсизлиги ҳар қандай ҳуқуқий давлатнинг асосий мезонларидан бири ҳисобланади. Аммо Фарғона вилоятининг Қўқон шаҳрида юз берган ҳолат жамоатчиликда жиддий хавотир уйғотмоқда.

Маълум қилинишича, «Халқ дарди» оммавий ахборот воситаси асосчиси Саиджонов Акмалжонга нисбатан «quqon_house» номи остида уй савдоси билан шуғулланиб келган шахс томонидан аудиоёзув орқали ўлим билан таҳдид қилингани, хусусан, «пишириб юбориш» каби иборалар ишлатилгани, шунингдек турли босимлар ўтказилгани айтилмоқда.

Агар мазкур аудиоёзув ҳақиқий бўлса ва ундаги таҳдидлар тасдиғини топса, бу нафақат бир журналистга нисбатан босим, балки сўз эркинлигига қарши қаратилган жиддий ҳолат сифатида ҳуқуқий баҳоланиши лозим.

Шу муносабат билан Фарғона вилояти Ички ишлар бошқармасидан ушбу ҳолатни алоҳида назоратга олишни, аудиоёзувдаги таҳдидларга ҳуқуқий баҳо беришни, барча ҳолатларни холисона ўрганишни ҳамда қонун талабларига мувофиқ айбдор шахсга нисбатан тегишли чоралар кўришни сўраймиз.

Бугун Фарғона вилоятида жиноятчиликка қарши кескин кураш олиб борилаётган бир пайтда жамоатчиликни бир савол ўйлантирмоқда?! Қўқонда ҳали ҳам «кўча қонунлари» устунми? ёки қонун устуворлигими?

Ушбу ҳолат юзасидан ҳуқуқни муҳофаза қилувчи органларнинг расмий муносабати ва қонуний чоралари нафақат бир журналистнинг хавфсизлиги, балки сўз эркинлиги ва қонун устуворлигига бўлган ишонч учун ҳам муҳим аҳамият касб этади.