SUD AYTDI OZOD ETING. KIM QARSHI ChIQYAPTI?

2026 yil 9 fevral kuni soat 18:45 da Jinoyat ishlari bo'yicha Farg'ona shahar sudi tomonidan qabul qilingan ajrim qonun ustuvorligi sinovi edi. Sud Farg'ona viloyati IIB Tergov boshqarmasi ish yurituvidagi jinoyat ishi doirasida gumon qilinuvchi Soxibnazarov Rahmatulloga nisbatan “qamoqqa olish” tarzidagi ehtiyot chorasini qo'llash haqidagi iltimosnomani rad etdi. Unga nisbatan “garov” ehtiyot chorasi qo'llanildi.

Qonunga ko'ra, sud ajrimi majburiy. U ijro etilishi shart. Muhokama tugadi qaror chiqdi. Nuqta. Ma'lumotlarga ko'ra, Farg'ona viloyati IIB va Farg'ona viloyati prokuraturasi turli bahonalar bilan gumon qilinuvchini ozod etmayapti. Holbuki, advokatlar va oila a'zolari garov pulini to'lashga tayyor. Ular belgilangan mablag'ni qabul qilishlarini so'rab, IIB binosi oldida sovuq havoda kutib turishibdi.

Agar sud qarori ijro etilmasa, bu nafaqat bir shaxs taqdiriga, balki butun huquqiy tizimga soya soladi. Sud hokimiyati mustaqilligi Konstitutsiya kafolati. Tergov organi yoki prokuratura sud ajrimini ijro etmaslik orqali qaysi huquqiy asosga tayanyapti?

Bu erda gap faqat bir gumon qilinuvchi haqida emas. Bu erda gap tizim haqida. Agar sud qarori qog'ozda qolsa, ertaga har qanday fuqaro xuddi shunday vaziyatga tushishi mumkin. Qonun ustuvorligi tanlab ishlaydigan mexanizm emas. U yo ishlaydi, yo ishlamaydi. Agar “garov” qo'llanilgan bo'lsa, demak qamoqda ushlab turish uchun huquqiy asos qolmagan. Sud ajrimini ijro etmaslik vakolat doirasidan chiqish emasmi? Bu holatga huquqiy baho beriladimi?

Jamoatchilik javob kutmoqda.